Делегация сапарын «Қазақмыс» корпорациясының Жезқазған мыс балқыту зауытынан бастады. Кездесуде өндірісті жаңғырту, өнеркәсіптік қауіпсіздік мәселелері және табиғат қорғау шаралары талқыланды. Кәсіпорынның қуаттылығы жылына 200 мың тоннаға дейін катодты мыс құрайды.
Келесі нысан Жезқазған жылу электр орталығы болды. Нәлібаев нысанның жылыту маусымына дайындығын тексеріп, әлеуметтік нысандардың жылумен қамтамасыз етілуінде ақаулар болмауы үшін жұмыстарды тұрақты бақылауда ұстауды тапсырды.
Жезқазған байыту фабрикасында бірінші вице-премьер өндірісті қарап, технологияларды жетілдіру және көлемдерді арттыру жоспарларын талқылады. Фабрика жыл сайын 21 миллион тонна руда өңдеп, шамамен 150 мың тонна мыс концентратын шығарады.
Нәлібаев сондай-ақ «Қазақмыстың» қала экономикасының әлеуметтік дамуына қосқан үлесін атап өтті. Сапар соңында Жезқазғанның даму бас жоспары, оның ішінде жаңа Батыс ауданы және Кеңгір су қоймасы жағалауын абаттандыру жобасы қаралды.
Премьер-министрдің бірінші орынбасары әлеуметтік инфрақұрылымды дамытуды күшейту, корпорациямен меморандум бойынша жобалардың орындалуын бақылау және өңірге инвестициялар тарту жұмыстарын жандандыру жөнінде тапсырмалар берді.