Құжатты Еуропа Кеңесі Парламенттік ассамблеясының депутаты, «Еуропа үшін либералдар мен демократтар альянсы» тобын ұсынатын Түркиядан Мехмет Акалын дайындады. Қол қоюға әртүрлі саяси топтар мен ұлттық делегациялардан 22 парламентарий қатысты.
Декларацияда референдум Қазақстанның институционалдық трансформациясы мен мемлекеттік басқару жүйесін жаңартудағы маңызды кезең ретінде аталған. Авторлар басқарудың неғұрлым теңгерімді моделіне көшуді, есептілікті нығайтуды, конституциялық сот төрелігіне қолжетімділікті кеңейтуді және адам құқықтары кепілдіктерін күшейтуді құптайды.
Парламентарийлер Қазақстан мен Еуропа Кеңесі арасындағы конституциялық даму, заң үстемдігі және адам құқықтарын қорғау мәселелері бойынша сындарлы диалогты атап өтті. Олар елдің демократиялық басқаруды және заң үстемдігін нығайту жөніндегі күш-жігерін қолдауды жалғастыруға дайын екендіктерін білдіріп, Қазақстанды Еуразиялық аймақтағы сенімді серіктес деп атады.
Бұған дейін мемлекеттік кеңесші Ерлан Қарин президенттің бірқатар конституциялық заңдарға қол қоюы конституциялық реформаның екінші кезеңін аяқтайтынын хабарлады.